Қазақстанда негізгі капиталға салынатын инвестиция 21,6 пайызға өсті

АСТАНА. ҚазАқпарат - Қазақстанның негізгі капиталына құйылатын инвестиция көлемі 2018 жылдың қаңтар-қыркүйек айларында 7517,1 млрд теңгені құраған. Бұл 2017 жылдың сәйкес кезеңімен салыстырғанда 21,6 пайызға көп, деп хабарлайды ҚазАқпарат ҚР Ұлттық экономика министрлігінің Статистика комитетіне сілтеме жасап.

Есепті кезеңде инвестицияның басым көзі болып шаруашылық субъектілердің жеке қаражаты қалып отыр. Оның көлемі 5496 млрд теңгені құрады. Қаңтар-қыркүйек айларында машина, жабдықтар, көлік құралдары, құрал-cаймандар және оларды күрделі жөндеуге бағытталған инвестициялық салымдар 16,5 пайызға өскен. 

Негізгі капиталға салынатын инвестицияның айтарлықтай үлесі тау-кен қазу өнеркәсібі мен карьерлерді өңдеу (42,2 пайыз), жылжымайтын мүлікпен байланысты операциялар (13,3 пайыз) және көлік пен қаттауда болған. Ірі кәсіпорындар инвестициялық салымдарының көлемі 4195,8 млрд теңгені құрады.