Қазақстанда өткен аптада болған кадрлық тағайындаулар
АСТАНА. KAZINFORM – Өткен аптада елімізде бірқатар кадрлық ауыс-түйіс болды.
Атап айтқанда, Президент Жарлығымен Нұрдәулет Игілікұлы Қилыбай Маңғыстау облысының әкімі болып тағайындалды.
Нұрдәулет Қилыбай 1978 жылы Маңғыстау облысы Бейнеу ауданында дүниеге келген. Білімі жоғары. «Тасымалдауды ұйымдастыру жөніндегі инженер», «Қаржы және қаржы құқығы» маманы. 2018 жылы АҚШ-тың Бостон қаласында Stafford House халықаралық мектебінде білім алған.
Еңбек жолын 1999 жылы Маңғыстау тасымалдау бөлімшесі станциясының кезекшісі қызметінен бастаған. Кейін Астана станциясында кірме жолдары бойынша жүктерді қабылдап-тапсырушы, «ҚТЖ» ҰК» акционерлік қоғамынының бас маманы, бөлім бастығы, магистральды желілер дирекциясы басқарушысының көмекшісі қызметтерінде болды. 2005-2009 жылдар аралығында Қазақстан Республикасы Көлік және коммуникациялар министрлігі Көлік және қатынас жолдары комитетінің бөлім бастығы, басқарма бастығы, төрағаның орынбасары қызметін атқарған.
2009-2010 жылдары «Вокзал-сервис» АҚ президенті, «ҚТЖ» ҰК» АҚ Жолаушыларды тасымалдау жөніндегі басқарушы директоры болды. 2010-2011 жылдары Қазақстан Республикасы Көлік және коммуникациялар министрлігі Көлік және қатынас жолдары комитетінің төрағасы қызметін атқарды. 2011-2012 жылдар аралығында «ҚТЖ» ҰК» АҚ президентінің кеңесшісі, кейін осы акционерлік қоғамның Маңғыстау жолдары бөлімшесі филиалының директоры болды.
2012-2013 жылдары Қазақстан Республикасы Көлік және коммуникациялар министрлігі Көлік және қатынас жолдары комитетінің төрағасы қызметінде болды. 2013-2017 жылдары «ҚТЖ» ҰК» АҚ аппарат басшысы - атқарушы директоры, «ҚТЖ» ҰК» АҚ атқарушы директоры - «Жолаушылар тасымалдау» АҚ президенті, «Теміржолсу» АҚ Бас директоры - Басқарма төрағасы қызметін атқарды. 2018-2020 жылдары – Маңғыстау облысы әкімінің орынбасары. 2020 жылдың маусым айынан бастап Ақтау қаласының әкімі лауазымында болды.
2022 жылдың қазан айынан бүгінге дейін Маңғыстау облысы әкімінің орынбасары қызметін атқарды. 2023 жылғы 25 қаңтарда «Өзенмұнайгаз» АҚ бас директоры болып тағайындалған еді.
Мемлекет басшысының Жарлығымен Тимур Қалдыбайұлы Тілегенов Халықаралық азаматтық авиация ұйымы жанындағы Қазақстан Республикасының Тұрақты өкілі лауазымына тағайындалды.
Тимур Тілегенов 1988 жылы 20 наурызда дүниеге келген. 2021 жылы Францияның Ұлттық азаматтық авиация мектебін (ENAC) «Әуе көлігін басқару» мамандығы бойынша, 2014 жылы Қазақстан Республикасы Президентінің жанындағы Мемлекеттік басқару Академиясын «Халықаралық қатынастар» мамандығы бойынша, 2009 жылы Л. Н. Гумилев атындағы Еуразия ұлттық университетін «Халықаралық қатынастар» мамандығы бойынша үздік бітірді.
2009 жылғы қазаннан 2019 жылғы қазанға дейін Қазақстан Республикасы Көлік және коммуникациялар министрлігінің Азаматтық авиация комитетінде сарапшы, бас сарапшы, бас сарапшы – халықаралық қатынастар және авиациялық тасымалдар басқармасының аға мемлекеттік авиация инспекторы лауазымдарында жұмыс істеді.
2019 жылғы қазаннан 2022 жылғы қаңтарға дейін Қазақстан Республикасы Индустрия және инфрақұрылымдық даму министрлігінің Азаматтық авиация комитетінде авиациялық тасымалдар және халықаралық әуе қатынасын реттеу басқармасының басшысы лауазымында болды.
Қазақстан Республикасы Президентінің 2021 жылғы 2 желтоқсандағы Жарлығымен Қазақстан Республикасының Құрмет грамотасымен марапатталған.
Мұнан бөлек, Мемлекет басшысының өкімімен Ақан Ақасұлы Рахметуллин Қазақстан Республикасы Сыртқы істер министрінің бірінші орынбасары лауазымына тағайындалды.
Ақан Ақасұлы Рахметуллин 1967 жылы 2 ақпанда Алматыда туған. 1991 жылы Алматы энергетикалық институтын бітірді. І сыныпты Төтенше және Өкілетті Уәкіл дипломатиялық дәрежеге ие. Ағылшын және урду тілдерін еркін меңгерген. Өзінің дипломатиялық мансабын 1993 жылы референт лауазымынан бастаған. Қазақстанның Пәкістандағы, Аустриядағы елшіліктерінде, Қазақстанның Нью-Йорктегі БҰҰ жанындағы Тұрақты өкілдігінде жұмыс істеп, онда БҰҰ Бас Ассамблеясының Үшінші комитетінің, БҰҰ түрлі органдарына сайлаудың мәселелерін жүргізді, сондай-ақ Қазақстанның Вена қаласындағы ЕҚЫҰ жанындағы Тұрақты өкілдігінде қызмет атқарды. Қазақстанның ЕҚЫҰ-ға төрағалығы кезінде Ұйымның екінші өлшемінің (экология және экономика мәселелері) жұмысын үйлестірді.
ҚР СІМ-нің Алматыдағы өкілдігінің кеңесшісі болып, Қазақстанның халықаралық ұйымдармен ынтымақтастық мәселелеріне жетекшілік етті. Орталық аппаратта Көпжақты ынтымақтастық департаментін басқарды. 2019-2021 жылдары Қазақстанның Пәкістандағы Елшісі, ал 2021-2022 жылдары Сыртқы істер министрінің орынбасары болды.
2022 жылы ҚР Сыртқы істер министрінің бірінші орынбасары лауазымында қызмет ақтарды. ҚР Сыртқы істер министрінің бірінші орынбасары лауазымына тағайындалғанға дейін 2022 жылдың қазан айынан бастап Қазақстанның Нью-Йорктегі БҰҰ жанындағы Тұрақты өкілі қызметін атқарды.
Ал оның орнына Қайрат Ермекұлы Омаров Қазақстан Республикасының Біріккен Ұлттар Ұйымы жанындағы Тұрақты өкілі болып тағайындалды.
Қайрат Омаров 1963 жылы Өзбекстанда, Ферғана қаласында туған. Алматы шет тілдері педагогикалық институтын бітірген (1985). Ұлыбритания Сыртқы істер министрлігінде еңбек өтілінен өткен (1992).
Еңбек жолы: Қазақстан Ғылым академиясы Тарих, этнография және археология институтының ғылыми қызметкері; Қазақстан Жазушылар одағы жанындағы Көркем аударма бойынша Бас редакциялық алқасында ағылшын тілінен аудармалардың бас редакторы (1989-1991); Қазақстан Республикасы Сыртқы істер министрлігінің екінші, бірінші хатшысы, Еуропа және Америка бөлімінің меңгерушісі (1992-1994); Қазақстан Республикасы Сыртқы істер министрлігінің басқарма бастығы, Еуропа департаменті директорының орынбасары (1996-1998); Қазақстан Республикасының АҚШ-тағы Елшілігінің кеңесші-елшісі, Қазақстан Республикасы Сыртқы істер министрлігінің айрықша тапсырмалар жөніндегі Елшісі (1998-2004); ҚР Президенті Әкімшілігінің Сыртқы саясат орталығының бас инспекторы (2004); ҚР-ның Үндістан Республикасындағы Төтенше және Өкілетті Елшісі (2004-2008); ҚР-ның Шри-Ланка Демократиялық Социалистік Республикасындағы Төтенше және өкілетті Елшісі міндетін қоса атқарушы (2008-2009); ҚР Сыртқы істер министрінің орынбасары (2009-2013); 2013 жылғы қаңтардан бастап 2017 жылдың қаңтарына дейін – Қазақстан Республикасының Америка Құрама Штаттарындағы Төтенше және Өкілетті Елшісі. 2017-2020 жылдары – Қазақстанның БҰҰ жанындағы тұрақты өкілі.
Сонымен қатар ол Қазақстан Республикасының Австрия Республикасындағы Төтенше және Өкілетті Елшісі (2020 жылдан бастап), Қазақстан Республикасының Словения Республикасындағы Төтенше және Өкілетті Елшісі қызметін қоса атқарушы (2021 жылдан), Қазақстан Республикасының Вена қаласындағы халықаралық ұйымдары жанындағы тұрақты өкілі болды. Жаңа тағайындауға дейін еліміздің Сыртқы істер министрінің бірінші орынбасары қызметін атқарды.
Президенті келісімі негізінде Бас прокурордың бұйрығымен 3-сыныпты мемлекеттік әділет кеңесшісі Айдос Серікханұлы Майлыбаев Маңғыстау облысының прокуроры лауазымына тағайындалды.
Айдос Майлыбаев еңбек жолын 2001жылы Жамбыл облысы Тараз қаласы прокурорының көмекшісі лауазымынан бастаған. Әр жылдары Алматы облысы Жамбыл және Панфилов аудандарының прокуроры, Жамбыл облысы прокурорының орынбасары, Ақтөбе облысы прокурорының бірінші орынбасары қызметтерін атқарған. Жаңа қызметке тағайындалғанға дейін 4 жылдан астам Ақмола облысының прокуроры болды.
Прокуратура органдарының құрметті қызметкері Айдос Майлыбаев заңдылық пен құқықтық тәртіпті нығайтуға қосқан үлесі үшін «Жауынгерлік ерлігі үшін» медалімен және 2-дәрежелі «Айбын» орденімен наградталған.
Президент Әкімшілігінің келісімі бойынша Қаржылық мониторинг агенттігі төрағасының бұйрығымен Бақытжан Абулхаиров Солтүстік Қазақстан облысы бойынша Экономикалық тергеп-тексеру департаментінің басшысы қызметіне тағайындалды.
Бақытжан Абулхаиров Астана қаласының тумасы. Қаржы полициясы академиясының түлегі. 2007-2016 жылдар аралығында қаржы полициясы органында және сыбайлас жемқорлыққа қарсы қызметте түрлі лауазымда еңбек етті. 2016 жылдан бастап экономикалық тергеп-тексеру қызметінде жұмыс істеп келеді. 2022 жылдан бастап осы тағайындауға дейін Шымкент қаласы бойынша экономикалық тергеп-тексеру департаменті басшысының орынбасары болып еңбек етті.
Асхат Хасенов «ҚазМұнайГаз» ҰК АҚ басқарма төрағасының міндетін атқарады.
Асхат Хасенов Қаныш Сәтбаев атындағы Қазақ ұлттық техникалық университетін «Мұнай және газ ұңғымаларын бұрғылау» мамандығы бойынша, сондай-ақ Халықаралық бизнес университетін «Менеджмент» мамандығы бойынша тәмамдаған.
Еңбек жолын 2005 жылы «Торғай Петролеум» АҚ Мұнай және газ өндіру цехының 3-разрядты операторы қызметінен бастаған. 2006-2010 жылдары «Мұнай және газ өнеркәсібінің бас диспетчерлік басқармасы» АҚ-да жұмыс істеді, онда техникалық реттеу басқармасының жетекші маманынан бастап вице-президенттің басқарушылық лауазымына дейін қызмет атқарды. Әр жылдары мемлекеттік органдарда жауапты қызметте болды. 2022 жылдың қаңтарынан 2024 жылдың мамырына дейін ҚР Энергетика вице-министрі қызметін атқарып келді.