15:45, 01 Тамыз 2024

Қазақстанда Президенттің кадрлық резервіне іріктеу ережесі өзгертілді

АСТАНА. KAZINFORM – Мемлекет басшысы Қасым-Жомарт Тоқаев ҚР Қарулы Күштердің, Ұлттық ұланның, құқық қорғау және арнаулы мемлекеттік органдардың, сондай-ақ азаматтық қорғау органдарының Жоғарғы қолбасшылығы мен басшылығының Президенттік резервіне кандидаттарды іріктеу қағидаларына өзгерістер енгізу туралы Жарлыққа қол қойды.

Фото: gov.kz

Енгізілген түзетулерге сәйкес, енді Президенттік резервке үміткерлерді іріктеу әскери қызметшілердің жеке және іскерлік қасиеттерін бағалау, олардың қызметтік қызметінің нәтижелері және аттестаттау шешімі негізінде ғана жүзеге асырылмайды. Мемлекеттік қызмет істері жөніндегі уәкілетті орган белгілеген өлшемдер бойынша кадрлық ақпараттық жүйе арқылы жиналған ұпайлар да есепке алынбақ.

Ал арнаулы мемлекеттік органдарында Президенттік резервке кандидаттар жеке және іскерлік қасиеттеріне, жұмыс нәтижелеріне және аттестаттау комиссиясының шешіміне қарай іріктеледі.

Жарлық 2024 жылдың 31 шілдесінде күшіне енді.

Жарлық Мамандық Президенттік кадр резерві Қазақстан Президенті
Оралхан Қожанов
2013 жылы Алматы қаласындағы Абай атындағы ҚазҰПУ-ді журналистика мамандығы бойынша тәмамдаған. Әр жылдары «Баянтау», «Ауыл тынысы», «Отарқа», «Сарыарқа самалы», «Қазақ үні», «Егемен Қазақстан» газеттерінде, «Ұлыс медиа» порталында қызмет атқарды.