Қазақстанда шипажайларға «жұлдыздар» берілмек
Бұл жайында Қазақстанның ұлттық шипажайлар қауымдастығының президенті Саягүл Қайыргелдина мәлім етті, деп хабарлайды ҚазАқпарат.
«Қазақстан республикасының шипажайлар қорының ұлттық тізілімін жасауды аяқтап, оны қазақстандық шипажайлар базасында сауығу мүмкіншілігі туралы қолжетімді ақпараттармен қамтамасыз ету үшін шынайы жұмыс тетігіне айналдыру қажет. Сонымен қатар шипажай нысандарының міндетті жіктемесін бекітіп, медициналық қызмет деңгейі мен орналасу жайлылығы бойынша санаттарға бөлу керек. (...)
Шипажай ұйымдарының «жұлдызы», сертификаты, аккредитациясы мен аттестациясы бойынша да жұмыс жүргізбек ойымызда бар.Өйткені, қазіргі таңда бұл саламен, шипажай бағытымен айналысатын орган жоқ», - деді Саягүл Қайыргелдина бүгін «Шипажай-2017» ғылыми-тәжірибелік конференциясы барысында.
Дегенмен, оның айтуынша, Қазақстанның ұлттық шипажайлар қауымдастығы шипажайларға «жұлдыз» берумен айналыспайды. Оның сөзіне қарағанда, шипажай ұйымдары медициналық мекемелер секілді аттестациядан өтуі тиіс. Бұл шипажайдың медицина қызметкерлеріне ғана емес сонымен бірге аталған ұйымдардың топ-менеджерлеріне де қатысты. Мұнан бөлек, қауымдастық Қазақстанның шипажай ұйымдарының паспортталуын қалыптастыру бойынша да құжаттар әзірлемек.
«Шипажайлық емдеуге қатысы бар кешендердің барлық нысандарын басқарудың бірыңғай жүйесін құру қажет. Яғни, шипажайларды басқарудың орталықтандырылған жүйесін құрған жөн», - деді қауымдастық президенті.
Айта кетейік, бүгінгі таңда Қазақстанда 200-ден астам шипажай бар.