«Министрліктің негізгі бастамаларының бірі суармалы жерлерді енгізуге қатысты. Мемлекеттік бағдарлама аясында 2021 жылға дейін 610 мың гектар жерді енгізу қарастырылып отыр, оның ішінде 2019 жылы 124 мың гектар қамтылмақ. Арнайы салалық бағдарлама әзірленді, оның аясында болашақта тағы да 1,5 млн гектар суармалы жерді айналымға тарту қарастырылған», - деді вице-министр Парламент Мәжілісінде ауылдық жерлерде бизнесті дамытуда ӘКК-лер рөліне арналған дөңгелек үстел отырысында.
Оның сөзіне қарағанда, әлемдік тәжірибені ескере отырып, мемлекеттік-жекешелік әріптестік бойынша жеке инвестицияларды тарту арқылы қаржыландыру моделіне ауысу ұсынылады. Жаңа қадам бойынша тарифтік саясат жасалып, бұл өз кезегінде инвестициялардың қайтарылуын қамтамасыз етеді.
«Осы салаға алдағы 9-10 жылда 1,2 трлн теңге инвестиция тартылады деп күтілуде. Бұл тұрғыда суармалы жерлер аумағы 3,5 млн гектарға жеткізілмек. Осы егістіктерден алынатын өнімнің жалпы көлемі 3,7 трлн теңгені құрайды. Аталған жобаларды жүзеге асыру әлеуметтік-кәміпкерлік корпорацияларды қамтамасыз ете алады», - деді Берік Бейсенғалиев.