АСТАНА. KAZINFORM – Қазақстанда 2027 жылғы 1 шілдеге дейін Ұлттық криптовалютаны талдау жүйесін құру жоспарланып отыр. Бұл туралы Қазақстанда цифрлық активтер индустриясын ынталандыру және дамыту шараларына арналған баспасөз мәслихатында Жасанды интеллект және цифрлық даму министрі Жаслан Мәдиев айтты.
Оның айтуынша, жаңа жүйе криптовалютамен жасалатын операцияларды тұрақты бақылауға мүмкіндік береді.
– Бұл жүйе криптовалюта операцияларын бақылауға, транзакцияларды талдауға және заңсыз қаржы схемаларын анықтауға арналған. Нарықтың ашық болуы бақылау болмайды дегенді білдірмейді. Азаматтарды қорғау және заңсыз операциялардың алдын алу – бұл жұмыстың маңызды бөлігі, – деді Жаслан Мәдиев.
Сонымен қатар министр орталықтандырылмаған қаржы платформаларының (DeFi) жұмысына талдау жүргізіліп, оларды реттеу тетіктері әзірленетінін атап өтті.
Айта кетейік, Қазақстанда цифрлық активтерді ерікті түрде жария ету тетігі енгізіледі.
Назерке Сүйіндік
Әл-Фараби атындағы Қазақ ұлттық университетінің түлегі. Ұлыбританиядағы Sussex университетінде магистр дәрежесін алған. Л.Н. Гумилев атындағы ЕҰУ-дің саясаттану мамандығы бойынша PhD докторанты. Бұған дейін BAQ.kz, Strategy2050.kz, QazaqTimes.kz секілді ақпараттық платформаларда жұмыс істеген. Қазір «ҚазАқпарат» халықаралық ақпарат агенттігінің тілшісі. Халықаралық саясат, дипломатия, медиа, ақпараттық саясат және қоғамдық-саяси мәселелерді тұрақты түрде жазып келеді.