Қазақстанда жаңа ұялы байланыс операторларының пайда болу мүмкіндігі жоқ

АСТАНА. ҚазАқпарат - Жаңа ұялы байланыс операторлары Қазақстан нарығына кіру үшін лицензия алуға өтінім жасамаған. Бұл туралы «ҚазАқпарат» ХАА ресми сауалына ҚР Ақпарат және коммуникациялар министрлігінің баспасөз қызметінен хабарланды.

«Байланыс туралы» Қазақстан Республикасы заңының 2-бабының 20-тармағына сәйкес, радиожиілік спектрі Қазақстан Республикасының ұлттық ресурсы болып табылады. Ұлттық ресурстың шектеулігіне байланысты Қазақстан Республикасының аумағында жаңа ұялы байланыс операторларының пайда болу мүмкіндігі жоқ»,-деп атап өтілген ведомство жауабында.

Сонымен, Қазақстан Республикасының аумағын қамту міндеттерін іске асыру, сондай-ақ түпкілікті тұтынушыларға бағаның деңгейін төмендету мақсатында министрлік «Қазақстан Республикасының кейбір заңнамалық актілеріне ақпарат және коммуникациялар мәселелері бойынша өзгерістер мен толықтырулар енгізу туралы» Қазақстан Республикасы заңының жобасы шеңберінде радиожиілік спектрін бірлесіп пайдалану нормасын қарастырды.

«Сондай-ақ, байланыс саласындағы қызметтерді ұсынуға лицензия алу үшін өтініш министрліктің атына келіп түспегенін хабарлаймыз»,-дейді баспасөз қызметі.

Белгілі болғандай, биыл ұялы байланыс операторлары тарапынан Қазақстан Республикасы заңнамасын бұзу фактілері тіркелмеген.