ҚАЗАҚСТАНДА ЖАСАЛҒАН: Шымкенттегі ойыншықтар көрмесінде отандық өнімдер ұсынылды
Шараның өтуiне облыстық мәдениет басқармасы мен облыстық бiлiм, жастар саясаты және тiлдер дамыту басқармалары қолдау көрсеттi. Iс-шараға облыс әкiмiнiң орынбасары Сәкен Қаныбеков, облыстық мәдениет басқармасының басшысы Күлия Айдарбекова қатысты, деп хабарлайды ОҚО әкімінің баспасөз қызметінен. Ойыншықтар жәрмеңкесiн өткiзудегi басты мақсат - отандық өнiмдердi насихаттау. Бұл ойыншықтардың сапасы шетелде шығарылатын өнiмдерден кем емес, әрі балалар үшін қауiпсiз. Көрмені тамашалауға келген қонақтарды қаладағы «Өнер» мектеп-интернаты оқушыларынан құралған оркестр сазды әуенмен қарсы алды. Танымал әншi-продюсер, «Бал-бала» ойыншықтарының авторы Қыдырәлi Болманов iс-шараның ашылу салтанатына қатысып, көрменің лентасын қиды. Мұнда «Бал-баланың» қуыршақтарынан бөлек, Шымкенттен шығарылатын «Шымкент-пластик» ойыншық зауытының бұйымдары да қойылды. Шара аясында ұйымдастырылған жергiлiктi қолөнершiлердiң кәдесыйлары мен балаларға арналған ұлттық киiмдер жәрмеңкесін көпшілік кеңінен тамашалады.