Бұл туралы Kazinform Шымкент қаласы әкімінің баспасөз қызметіне сілтеме жасап хабарлайды.
Әс-шараға әлемдік бизнестің және қаржы секторының өкілдері және Қазақстан Республикасының Премьер-Министрі Әлихан Смайылов қатысты.
Шымкент қаласының әкімдігі тарапынан қала әкімінің орынбасары Айдын Кәрімов жалпы сомасы 662 млн АҚШ долларына екі шетелдік компаниямен меморандумға қол қойды.
Біріншісі бойынша Түркияның ірі компаниясы «Alarko Holding» қала аумағында жаңа форматтағы жылыжай кешенін салады. 650 млн АҚШ доллар сомасына жүзеге асырылатын инвестициялық жоба кезең-кезеңмен жалпы 500 га аумақта 5 мың жаңа жұмыс орнын құруды, жаңа технологияларды енгізу арқылы азық-түлік қауіпсіздігі мен жылыжай бизнесін дамытуға ықпал етеді.
Екіншісі бойынша «IŞIKLAR PACKAGING Ltd» түрік компаниясы «крафт-ролл» қағазын шығаратын зауытын салады. Жобаның құны 12 миллион АҚШ долларын құрайды.
Екі жоба да тұрақты өңірлік өсуге, инвестициялар тартып, қала экономикасының дамуына және халықаралық ынтымақтастықты нығайтуға ықпал етеді.