Қазақстандық әуе компаниялар 15 млн-ға жуық жолаушы тасымалдаған

АСТАНА. KAZINFORM — Соңғы 5 жылда азаматтық авиация саласының көрсеткіштері екі есеге өсті. Бұл туралы Көлік вице-министрі Талғат Ластаев баяндады.

Оның айтуынша, өткен жылы қазақстандық әуе компаниялар 14 млн 700 мың жолаушыны тасымалдады, ол 2023 жылдың көрсеткішімен салыстырғанда 11%-ға көп.

Әуежайдарда қызмет көрсетілген жолаушылар саны 14%-ға өсіп, 29 млн 700 мың адамды құрады.

— Ұшу қауіпсіздігі — азаматтық авиацияның басты міндеті. Қазақстанда бұл көрсеткіш, Батыс Еуропа елдерінің көрсеткіштерімен қатар қоюға келеді — Халықаралық авиациялық ұйымының бағалауынша 82%-ды құрайды. Бұл әлемдік орташа деңгейден (70,8%) 11,2%-ға жоғары, — деді Т. Ластаев Үкіметтің бүгінгі отырысында.

2024 жылы Еурокомиссия Қазақстан әуе компаниялары үшін Еуропа Одағына ұшуға қатысты «Қара тізімдегі» барлық шектеулерді толығымен алып тастады.

— Биыл шілде айында Мемлекет Басшысының шақыруымен алғаш рет Халықаралық азаматтық авиация ұйымы (ИКАО) Кеңесінің президенті Сальваторе Шаккитано ресми сапармен Қазақстанға келеді. Бұл Қазақстан мен ИКАО арасындағы ынтымақтастықтың жаңа сатысы болмақ, — деді вице-министр.

Айта кетейік, ИКАО Қазақстанның азаматтық авиация саласын 2050 жылға дейін дамытудың стратегиялық бас жоспарын әзірлейді.