АСТАНА. KAZINFORM – Тиранада (Албания) 23 жасқа дейінгі жастар арасында әйелдер күресінен өткен әлем чемпионатын қазақстандықтар жүлдесіз аяқтады.
25 қазан күні батысқазақстандық Зейнеп Баянова 53 келіге дейінгі салмақта жүлдеге біртабан жақын болды.
Зейнеп жұбаныш белдесуінде швециялық Эллен Остманды 5:1 есебімен ұтып, қола жүлде үшін таласуға мүмкіндік алды.
Қола жүлде үшін бәсекеде моңғолиялық Отгонтуя Чинболд бірінші кезеңде 2:0 есебімен алға кетті. Екінші кезеңде есепті 12:2-ге жеткізіп, белдесуді мерзімінен бұрын аяқтады. Осылайша, З.Баянова бесінші орынды қанағат тұтты.
Сондай-ақ 24 қазан күні қола медальға таласқан Лаура Ғаниқызы (50 кг) жапониялық Уми Итодан, ал Алина Ертөстік (76 кг) Күншығыс елінің тағы бір өкілі Нодока Ямамотодан ұтылып қалған болатын.
Еске сала кетейік, бұдан бұрын қазақстандық қос балуанның әлем чемпионатының қола жүлдесі үшін күресетінін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).