ЭЛЬ-КУВЕЙТ. KAZINFORM – Қазақстандық мергендер Әлішер Айсалбаев пен Мария Дмитренко Кувейт астанасында стенд атудан өтіп жатқан лицензиялық Азия чемпионатында жеңімпаз атанды.
Спортты дамыту дирекциясынан мәлім еткендей, қазақстандықтар трап бағдарламасы бойынша жұптық бәсекеде 140 ұпай жинап, топ жарды.
Ирандықтар Мохаммад Бейранванд — Марзи Парвареш 137 ұпаймен екінші орынға шықса, қытайлықтар Юхао Го — Сяоцзинь Ван (136 балл) үздік үштікті түйіндеді.
Кеше Мария Дмитренко жекелей және командалық сында екі қола жүлдені жеңіп алған еді.
Стенд атудан Азия чемпионаты 22 қаңтарға дейін созылады.
Аталмыш жарыста 35 елден келген 350-ден астам мерген бақ сынауда.
Скит және трап бағдарламасы бойынша Қазақстаннан 18 спортшы өнер көрсетеді.
Еске сала кетейік, бұдан бұрын қазақстандық мергеннің Азия чемпионатының қола жүлдегері атанғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).