МАРСЕЛЬ. KAZINFORM – Қазақстанның екінші, әлемнің 56-ракеткасы Александр Шевченко Марсель (Франция) ATP 250 турнирінің ширек финалынан тыс қалды.
Қазақстандық теннисші екінші айналымда әлемнің 8, осы жарыстың өткен жылғы чемпионы әрі биылғы 1-ракеткасы, Польша өкілі Хуберт Гуркачқа тап болды.
Бірінші партияда Гуркачтың басымдылығы айқын байқалды – 6:1. Ол екінші сетті де өз есебіне жазды – 6:4.
Бір сағаттан астам уақытқа созылған бәсеке барысында поляк теннисшісі 13 эйс жасап, 8 брейк-пойнттың бесеуін пайдаланып үлгерді. А.Шевченко 3 эйс, 2 брейкті (5 брейк-пойнт) қанағат тұтты.
Осылайша, Александр Шевченко жарыс жолынан шығып қалды.
Х.Гуркач жартылай финалға шығу үшін әлемнің 66-ракеткасы, чехиялық Томаш Махачпен таласады.
Еске сала кетейік, бұдан бұрын Дэвис кубогінде Қазақстан құрамасының қарсыласы анықталғанын жазған болатынбыз.
Сондай-ақ Елена Рыбакина Әбу-Даби турнирінің ширек финалына шықты.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).