Қазақстандықтар Денис Евсеев пен Тимофей Скатов жұптық сында Канберра (Аустралия) челленджер турнирінің ширек финалына шықты, деп хабарлайды Kazinform.
Қазақстандық жұп алғашқы айналымда аустралиялықтар Алекс Болт – Люк Сэвилмен ойнады.
Бірінші партияда аустралиялық дуэт 6:3 есебімен басымдық танытты.
Есесіне екінші партияда Д.Евсеев пен Т.Скатов қарымта қайырды – 7:6 (7:3). Содан кейін супер тай-брейкте жеңісті жұлып алды – 10:7. Бір сағат 38 минутқа созылған матч барысында олар 2 эйспен бірге 3 брейк-пойнттың екеуін пайдаланды. Аустралиялықтар 3 эйс, 3 брейкпен (7 брейк-пойнт) көзге түсті.
Тимофей Скатов – Денис Евсеев жартылай финалға шығу үшін жарыстың 3-ракеткалары, эквадорлық Диего Идальго – колумбиялық Кристиан Родригеспен таласады.
Еске сала кетейік, бұдан бұрын Денис Евсеевтің Канберрада екінші айналымға өткенін жазған болатынбыз.
Сондай-ақ Анна Данилина Окленд турнирінің ширек финалына шықты.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).