ПАРИЖ. KAZINFORM – Қазақстандықтар Александр Бублик пен Александр Шевченко жұптық сында Франция ашық чемпионатының екінші айналымына шықты.
Қазақстандық жұп Ролан Гарростың алғашқы айналымында сербиялықтар Миомир Кецманович – Душан Лайовичты жолдан тайдырды.
Бірінші партияда қос Александр 6:4 есебімен басымдылық танытса, екіншісінде сербиялық дуэт есе қайырды – 6:1.
Үшінші, шешуші сетте Бублик – Шевченко жеңісті жұлып алды – 6:3. Бір сағат 37 минутқа созылған бәсеке барысында екеуі 2 эйс, 19 брейк-пойнттың жетеуін пайдаланды. Сербиялық жұп та 2 эйс, 7 брейкпен (17 брейк-пойнт) көзге түсті.
Александр Бублик – Александр Шевченко үшінші айналымға өту үшін доданың 8-ракеткалары, аргентиналықтар Максимо Гонсалес – Андрес Мольтенимен шеберлік таластырады.
Бұдан бұрын Бублик пен Шевченко жекелей сында екінші айналымда-ақ жарыстан шығып қалған еді.
Еске сала кетейік, бұдан бұрын Александр Недовесовтің Ролан Гаррос турнирінің екінші айналымына шыққанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).