Қазақстандықтар Бейбіт Жұқаев пен Денис Евсеев Қытайдағы Шэньчжэнь челленджер турнирінің жартылай финалына шыға алмады, деп хабарлайды Kazinform.
Дүниежүзілік рейтингте 260-орында тұрған Денис Евсеев әлемнің 146-ракеткасы, америкалық Александр Ковачевичке 2:6, 4:6 есебімен есе жіберді.
Бір сағат 22 минутқа созылған матчта Д.Евсеев 3 эйс жасап, 9 брейк-пойнттың біреуін ғана пайдаланды.
А.Ковачевич 6 эйс, 4 брейкпен (9 брейк-пойнт) көзге түсті.
Рейтингте 302-сатыдағы Б.Жұқаев әлемнің 503-ракеткасы, белоруссиялық Егор Герасимовтан айласын асыра алмады – 7:6 (7:4), 2:6, 3:6.
Екі сағат 17 минутқа созылған тартысты бәсеке барысында Бейбіт 14 эйспен бірге 2 брейк-пойнтты мүлт жіберген жоқ.
Қарсыласы 8 эйс жасап, 12 брейк-пойнттың бесеуін өз есебіне жазды.
Осының алдында Б.Жұқаев Шанхай мастерс турнирінде алғаш рет өнер көрсеткен болатын.
Қазіргі кезде ATP Live рейтингісінде Д.Евсеев 239-ыншы, Б.Жұқаев 248-орынға көтеріліп тұр.
Еске сала кетейік, Анна Данилинаның Гонконг турнирінің ширек финалына жолдама алғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).