Қазақстандық теннисшілер Дмитрий Попко мен Асылжан Арыстанбекова Анталиядағы (Түркия) ITF турнирін сәтті өткізіп жатыр, деп хабарлайды Kazinform.
Дүниежүзілік рейтингіде 504-орында тұрған Д.Попко ширек финалда әлемнің 327-інші, жарыстың 1-ракеткасы, румыниялық Филип Кристиан Жиянумен кездесті. Қазақстандық спортшы қарсыласын 6:4, 7:5 есебімен тізе бүктірді.
Дмитрий Попко финалға шығу үшін әлемнің 404-ракеткасы, ұлыбританиялық Джей Кларкпен таласады.
17 жастағы Асылжан Арыстанбекова әйелдер арасында дәл осындай додада екінші айналымда италиялық Франческа Пейсті 7:5, 7:5 есебімен жеңіп, ширек финалға жолдама алды.
Асылжан әлемнің 700-ракеткасы, сербиялық Яна Бойовичпен жартылай финал жолдамасын сарапқа салады.
Еске сала кетейік, бұдан бұрын 17 жасар қазақстандық теннисшінің Түркиядағы турнирді жеңіспен бастағанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).