АСТАНА. KAZINFORM – Қазақстандық теннисшілер Александр Бублик пен Александр Шевченконың Дубай ATP 500 турнирінде кімдермен ойнайтыны белгілі болды.
Әлемнің 10, жарыстың 2-ракеткасы А. Бублик бастапқы кездесуінде іріктеу сайысы жеңімпаздарының бірі, рейтингіде 77-орындағы германиялық Ян-Леннард Штруфпен шеберлік байқасады.
Қазақстандық теннисші германиялық спортшыны өткен айда Роттердам (Нидерланд) ATP 500 жарысының екінші айналымында 7:6 (7:2), 4:6, 6:3 есебімен жеңген еді.
Тағы бір қазақстандық, рейтингіде 79-сатыда тұрған А.Шевченко іріктеу сайысының финалында әлемнің 72-ракеткасы, франциялық Кентен Галиға 6:7 (6:8), 5:7 есебімен жеңіліп қалған болатын. Соған қарамастан, ұйымдастырушылар А.Шевченконы арнайы шақыртумен негізгі додаға қосты.
Қазақстандық теннисші алғашқы айналымда әлемнің 17-ракеткасы, ресейлік Карен Хачановқа тап келді.
Дубай додасы 28 ақпанда аяқталып, жеңімпаз анықталады.
Еске сала кетейік, бұдан бұрын Александр Шевченконың Дубайдағы турнирдің іріктеу сайысын сәтті бастағанын жазған едік.
Сондай-ақ Әмір Омарханов Тунистегі турнирде топ жарды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).