АСТАНА. KAZINFORM - Шри-Ланка астанасы Коломбо қаласында өтіп жатқан 22 жасқа дейінгілер арасында Азия чемпионатында қыздардан үш боксшы финалға шықты.
Ел құрамасынан Томирис Мырзақұл (52 келі) Шри-Ланка спортшысы Ясин Фернандоны 5:0 есебімен орта жолда қалдырып, финалға шықты. Оның финалдағы қарсыласы енді анықталады.
Былтыр аталған Азия чемпионатында күміс жүлдегер атанған Элина Базарова жартылай финалда Лин әл-Шаихты (Сауд Арабиясы) айқын басымдықпен тізе бүктірді. Ол 2-раундта қарсыласын 3 мәрте нокдаунға жіберді. Шешуші жекпе-жектегі оның қарсыласы Шри-Ланка немесе Вьетнам өкілі болады.
Былтыр Азия чемпионы атанған Гүлнар Тұрапбай (50 келі) биыл сол жетістігін қайталауға жақын тұр. Ол жартылай финалда Моңғолиядан келген Уранцог Анцецегті 5:0 есебімен тізе бүктірді. Енді ол Вьетнам немесе Шри-Ланка боксшысының бірімен кездеседі.
Еске салсақ, құрлықтық дода 24 мамыр күні мәресіне жетеді.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.