АСТАНА. KAZINFORM — Қазақстандық Әдемі Әлсейпулова Албания астанасы Тиранада өткен Tennis Europe Tirana Open U12 турнирінің абсолютті чемпионы атанды.
Қазақстандық жас теннисші алдымен ресейлік Арина Сыроежкинамен бірге жұптық сында үздік шықты.
Содан кейін жекелей сында финалда тартысты матчта камбэк жасап, Беларусь өкілі Мария Микалайчикті қапы қалдырды – 4:6, 6:3, 10:5.
Осы жарыста Темірлан Жантеміров жұптық сында поляк Юлиан Зейбамен бірге финалға дейін жетті.
Өзбекстанның Наманган қаласында J30 Namangan ITF жарысы қазақстандық қыздар үшін сәтті аяқталды. Жұптық сындағы соңғы бәсекеде София Исакова мен Сәтима Төреген тағы бір қазақстандық Ариана Колбасина және ресейлік Виктория Егоровамен чемпиондық атақты сарапқа салды. Мұнда С.Исакова – С.Төреген қарсыластарынан 6:3, 6:3 есебімен басым түсті.
Еске сала кетейік, бұдан бұрын Юлия Путинцеваның әлемдегі үздік елу теннисшінің қатарына енгенін жазған болатынбыз.
Сондай-ақ Александр Недовесов әлемдік рейтингіде рекордтық нәтижеге қол жеткізді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).