Қазақстандық теннисші Полина Слепцова Шымкентте өтіп жатқан 18 жасқа дейінгілер арасындағы ITF Juniors J100 турнирінің абсолютті чемпионы атанды, деп хабарлайды ҚазАқпарат тілшісі.
Алматы теннис мектебінің түлегі П.Слепцова жекелей сында финалда отандасы Әдемі Аманкелдіні 6:2, 6:4 есебімен тізе бүктірді.
Жарыс барысында Полина қарсыластарына бірде-бір сет берген жоқ.
Жұптық сында ол Ә.Аманкелдімен бірге Анастасия Крымкова - Сәтима Төрегеннен басым түсті, есеп – 4:6, 6:4, 10:7.
Бір апта бұрын Полина Ташкентте дәл осындай жарыста жеңімпаз атанған еді. Соның нәтижесінде жасөспірімдер арасында әлемдік рейтингіде бірден 131 сатыны артқа тастап, 348-орынға көтерілген болатын. Енді алдағы аптада бұл көрсеткішін одан сайын жақсарта түседі.
Еске сала кетейік, бұдан бұрын Қазақстанның екінші, әлемнің 73-ракеткасы Юлия Путинцева Бейжің WTA 1000 турниріне жолдама алғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).