АСТАНА. KAZINFORM — Германияның Кирххайм-унтер-Текк қаласында 14 жасқа дейінгілер арасында екінші санаттағы Tennis Europe Baublies Jugend Cup жарысы мәресіне жетті.
Беделді додаға Германия, Қазақстан, Словакия, Словения, Швейцария, Гонконг, Чехия, АҚШ, Италия, Румыния, Қырғызстан, Аустрия, Франция, барлығы 13 елден 32 жас теннисші қатысып, бақ сынады.
Қазақстандық спортшылар жекелей және жұптық сында үздік өнер көрсетіп, жеңімпаз атанды.
Жекелей сында қазақстандықтар Айым Қанағатова мен Әдемі Әлсейпулова соңғы бәсекеде чемпиондық атақты өзара сарапқа салды. Тартысты бәсекеде Айым 7:6, 6:7, 6:2 есебімен жеңіске жетті.
Жұптық сында Қанағатова – Әлсейпулова қарсылас шақ келтірмей, финалда жарыстың 1-ракеткалары, чехиялықтар Софья Иракова – Аделя Свободаны камбэкпен жеңді – 5:7, 6:2, 10:6.
Еске сала кетейік, бұдан бұрын Бейбіт Жұқаевтың Мексикадағы турнирде қарсыласын айқын басымдылықпен жеңгенін жазған едік.
Сондай-ақ Елена Рыбакина Цинциннати турнирінің төртінші айналымына жолдама алды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).