Тауардың таңбалануы мен шығу тегін тексеруге мүмкіндік беретін «Нақты өнім» мобильді қосымшасы бүгінде 55 мыңнан астам рет жүктелген.
– Бүгінде қосымша 55 мыңнан астам рет жүктелді. Ал пайдаланушылар таңбалау кодтары арқылы 2,3 млн-ға жуық тауардың түпнұсқалығын тексерген. Ол үшін тұтынушыға тауардың қаптамасына басылған Data Matrix кодын сканерлеу жеткілікті. Осыдан кейін өнім туралы толық ақпарат, оның ішінде тауардың қозғалысы туралы мәлімет қолжетімді болады, – деді Әсет Нүсіпов.
Вице-министрдің айтуынша, егер тауарда міндетті таңбалау коды болмаса, код бүлінген немесе қосымша арқылы оқылмаса, тұтынушы бұл туралы тікелей «Нақты өнім» арқылы хабарлай алады.
– Бұл өтініш белгіленген тәртіппен мемлекеттік орган тарапынан қаралады. Бірыңғай оператордың мәліметіне сәйкес, бүгінде тұтынушылардан таңбалау талаптарының бұзылуына қатысты қосымша арқылы 10 мыңға жуық өтініш келіп түскен, – деді ол.
Айта кетейік, Қазақстанда жеңіл өнеркәсіп тауарларын міндетті цифрлық таңбалау 2026 жылғы 1 желтоқсаннан бастап кезең-кезеңімен енгізіледі.
Айта кетейік, міндетті таңбалау көлеңкелі айналымға қалай әсер ететінін жазғанбыз.