Қазақстандықтарға Еуроодақ елдеріне визалық режим жуырда жеңілдеуі мүмкін

АСТАНА. KAZINFORM – ҚР Премьер-Министрінің орынбасары – Сыртқы істер министрі Мұрат Нұртілеу отандастарымызға Еуропа елдеріне виза алу оңайлатылуы мүмкін екенін айтты. 

Еуропалық Одақтың Сыртқы істер және қауіпсіздік саясаты жөніндегі Жоғарғы өкілі, Еурокомиссияның вице-президенті Жозеп Борреллдің Астанаға ресми сапары барысында қазақстандықтар үшін Еуроодақ елдеріне визалық режимді жеңілдетуге уағдаласты. 

«Кездесудің маңызды бағыттарының бірі – Қазақстан азаматтары үшін Еуроодақтың визалық режимін жеңілдету. Доктор Жозеп Борреллмен осы түйінді шаруаның оң шешімін жуық арада табу мақсатында күш-жігер жұмылдыруға уағдаластық», - деді Мұрат Нұртілеу Еуропалық Одақтың Сыртқы істер және қауіпсіздік саясаты жөніндегі Жоғарғы өкілімен кездесуден кейін БАҚ өкілдері алдында. 

Бұған дейін ҚР Премьер-Министрінің орынбасары – Сыртқы істер министрі Мұрат Нұртілеу соңғы жылдары Қазақстан мен Еуроодақ елдері арасында өзара сенім, сыйластық пен ортақ басымдықтарға негізделген берік қарым-қатынас орнағанын мәлімдеген еді. https://kaz.inform.kz/news/kazakstan-men-euroodak-karim-katinasi-ozara-senmge-negzdelgen-murat-nurtleu-58fdb4/