АСТАНА. ҚазАқпарат - Қазақстандық бес боксшы Болгария астанасы Софияда өтіп жатқан «Странджа» халықаралық турнирінің жартылай финалына шықты, деп хабарлайды ҚазАқпарат тілшісі.
Айтулы додаға Қазақстан негізгі құраммен қатысуда.
Ұлттық олимпиада комитеті хабарлағанындай, Қазақстанның бес дүркін чемпионы Теміртас Жүсіпов 49 кг салмақта болгариялық Эргюнал Сабриді 5:0 есебімен айқын басымдылықпен ұтып, жартылай финалға жолдама алды.
Қазақстандық жас боксшы Санатәлі Төлтаев та 64 кг салмақта қытайлық Шензе Киді 5:0 есебімен тізе бүктірді.
Зәкір Сафиуллин 60 келіде тартысты бәсекеде грузиялық Отар Ераносянды жеңіп, ол да жартылай финалға шықты.
Сондай-ақ, Абылайхан Жүсіпов (69 кг) ресейлік Шахабас Махмудовты, Василий Левит (91 кг) америкалық Джаред Андерсонды қапы қалдырды. Тек аса ауыр салмақтағы Қамшыбек Қоңқабаев болгариялық Петар Белберовке есе жіберді.
Еске сала кетейік, бұдан бұрын алты боксшымыздың Болгариядағы турнирдің ширек финалына шыққанын жазған болатынбыз.
Ал Қайрат Ерәлиев, Ерік Әлжанов, Бек Нұрмағанбет және Әнуар Мұзаппаровтар жарыс жолынан шығып қалды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).