ҚЫЗЫЛОРДА. ҚазАқпарат - Қызылорданың «Қайсары» Түркияда өтетін оқу-жаттығу жиыны барысында Италияның «Сампдория» командасымен жолдастық кездесу өткізуді жоспарлап отыр, деп хабарлайды ҚазАқпарат тілшісі.
Айта кетсек, бүгін қызылордалық клубқа ресейлік маман Виктор Кумыков бас бапкерлікке тағайындалды.
«Қазақстан Премьер-лига командалары арасында алғашқы болып «Қайсар» алдағы маусымға дайындығын бастайды. Қызылордалық футболшылар осы мақсатта Түркияға барады. Оқу-жаттығу жиыны барысында бірнеше командамен жолдастық кездесу өткізу жоспарланған. Солардың бірі 23 желтоқсанда Италияның «Сампдория» командасына қарсы өтеді», - деді В.Кумыков журналистерге берген сұхбатында.
Биыл аталған клуб өз елінің біріншілігінде небәрі алты ұпай жинап, турнир кестесінде 19-орында келеді.
Командаға серб маманы Деян Станкович бас бапкерлік етеді.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.