АСТАНА. ҚазАқпарат – Қазақстандық Александр Недовесов жұптық сында Босния және Герцеговинаның Баня-Лука қаласында өтіп жатқан АТР 250 турнирінің жартылай финалына шықты, деп хабарлайды ҚазАқпарат тілшісі.
Александр Недовесов португалиялық Франциско Кабралмен бірге ширек финалда доданың үшінші ракеткалары болып тіркелген франциялықтар Садио Думбия – Фабиен Ребульмен шеберлік байқасты.
Қазақстандық-португалиялық жұп 7:6 (7:5), 6:1 есебімен жеңіске жетті.
Сағат жарымнан астам уақытқа созылған бәсеке барысында А.Недовесов пен Ф.Кабрал 2 эйс жасап, 9 брейк-пойнттың үшеуін пайдаланды. Франциялық жұп 2 эйс, 1 брейктен (7 брейк-пойнт) аса алмады.
А.Недовесов пен Ф.Кабралдың жартылай финалдағы қарсыластары кейін анықталады.
Бұдан бұрын осы жарыста тағы бір қазақстандық Андрей Голубев украиналық Денис Молчановпен бірге жартылай финалға өткен болатын.
Еске сала кетейік, бұдан бұрын Елена Рыбакинаның Штутгарт турнирін жеңіспен бастағанын жазған болатынбыз.
Сондай-ақ Қазақстанда алғаш рет теннистен әлем чемпионатының іріктеу сайыстары өтеді.
Қазақстандық теннисші Босниядағы жарыстың жартылай финалына шықты.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).