НҰР-СҰЛТАН. ҚазАқпарат - Бокстан әйелдер арасындағы халықаралық «Ұлттар кубогі» додасында тағы үш қазақстандық былғары қолғап шебері финалға шықты, деп хабарлайды ҚазАқпарат тілшісі.
Турнирде 60 келіде сынға түсіп жатқан Римма Волосенко түркиялық қарсыласынан айласын асырды. Ал 81 келіде шаршы алаңға шыққан Ләззат Күнгейбаеваға чехиялық спортшы қарсы тұра алған жоқ. Жеребе нәтижесімен Гүлсая Ержан 81 келіде бірден ақтық сынға жолдама алды.
Қазақстан құрамасы сапынан Валентина Хальзова түркиялық боксшыға жол беріп қойды. Ол турнирде осылайша қола жүлдені қанағат тұтты.
Естеріңізге сала кетелік, бұдан бұрын Арайлым Марат (48 келі), Дина Жоламан (54 келі) және Владислава Кухта (57 келі) финалға жолдама алғанын хабарлаған едік.
Халықаралық турнирде қазақстандық тоғыз боксшы аттанған болатын.
Аталмыш турнирде бұған дейін қазақстандық боксшылар 2012, 2015, 2016, 2018 жылдарда командалық есепте жеңімпаз атанды. Үш мәрте мұндай мәртебеге ресейліктер ие болды.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.