ШЫМКЕНТ. ҚазАқпарат - Қазақстандық Бейбіт Жукаев жұптық сында Шымкентте өтіп жатқан BeeTV Challenger 80 турнирініңжартылай финалына шықты, деп хабарлайды ҚазАқпарат тілшісі.
Ақтау қаласының түлегі, 21 жастағы теннисші ресейлік Алибек Качмазовпен бірге ширек финалда жарыстың 4-ракеткалары, ресейліктер Евгений Тюрнев - Евгений Карловскиймен күш сынасты.
Қазақстандық-ресейлік жұп бір сағаттан астам уақытқа созылған матчта 6:3, 7:5 есебімен жеңіске жетті.
Бейбіт пен Алибек бәсеке барысында 4 эйс жасап, 6 брейк-пойнттың тең жартысын пайдалана білді.
«Алғаш рет челленджер турнирінің жартылай финалына шыққаныма қуаныштымын. Ширек финалдағы тартысты матчта жеңіс үшін барымызды салдық. Енді ертең жартылай финалда доданың екінші ракеткалары, өзбекстандық Санжар Файзиев - грекиялық Маркос Каловелониспен кездесеміз. Финалға шығу үшін үздік өнер көрсете білуіміз керек», деді Б.Жукаев.
Еске сала кетейік, бұдан бұрын Зарина Диястың төрт айдан кейін тенниске қайта оралғанын, Александр Недовесовтің Франциядағы жарыстың жартылай финалына шыққанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).