АСТАНА. ҚазАқпарат - Қазақстандық теннисші Елена Рыбакина Лонсестонда (Аустралия) өткен ITF турнирінің жеңімпазы атанды, деп хабарлайды ҚазАқпарат тілшісі.
Дүниежүзілік рейтингте 169-орында тұрған Е.Рыбакина финалда әлемнің 131-ракеткасы, ресейлік Ирина Хромачевамен күш сынасты.
Бірінші партияда қазақстандық спортшы 7:5 есебімен жеңіске жетті. Екінші сетте есеп 3:3 болған мезетте ресейлік теннисші кездесуді жалғастырудан бас тартты.
Бәсеке 1 сағат 14 минутқа созылды.
Осылайша, Е.Рыбакина жүлде қоры 60 мың АҚШ долларына бағаланған жарыстың жеңімпазы атанды. Ол турнир барысында әуелі аустралиялық Нэйкта Бэйнс, осы жарыстың 1-ракеткасы, рейтингте 105-сатыдағы германиялық Лаура Зигемунд, Тайвань елінің өкілі Чжан Кайчжэнь және жартылай финалда бельгиялық Марина Заневскаяны тізе бүктірді.
Еске сала кетейік, бұған дейін Астанада өткен Дэвис кубогына іріктеу жарысында Бубликтің Қазақстанды алға шығарғанын және Қазақстан сенбі күні Португалиямен жұптық кездесуінде есе жібергенін жазған едік. Дегенмен, шешуші бәсекеде Кукушкин жеңіске жетіп, Қазақстан финалға өтті.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).