НҰР-СҰЛТАН. ҚазАқпарат – Қазақстандық теннисші қыздар жаңа маусымды Әбу-Дабиде бастайды, деп хабарлайды ҚазАқпарат тілшісі.
Әйелдер теннисі қауымдастығы (WTA) 5-13 қаңтарда өтетін ӘбуДаби турниріне қатысушылар тізімін жария етті.
Жарысқа қатысушылар арасында америкалық Софья Кенин, украиналық Элина Свитолина, чехиялықтар Каролина Плишкова мен Маркета Вондроушова, Беларусь өкілі Арина Соболенко, швейцариялық Белинда Бенчич, испаниялық Гарбинье Мугуруса сынды танымал теннисшілер бар.
Қазақстаннан айтулы додада Елена Рыбакина, Юлия Путинцева және Ярослава Шведова бақ сынамақшы.
Айта кетейік, 10-13 қаңтарда Дубайда Аустралия ашық чемпионатының іріктеу сайыстары болады. Ал негізгі жарыс 8 ақпанда басталады. Бұл «Үлкен дулыға» турниріне үздік 100 теннисшінің қатарына кіретіндердің дені қатысады. Қазақстандықтардан Е.Рыбакинаның рейтингте 19-ыншы, Ю.Путинцеваның 28-інші, Зарина Диястың 80-орында тұрғаны белгілі. Сонымен қатар Аустралия ашық біріншілігіне Я.Шведова да шақырту алды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).