НҰР-СҰЛТАН. ҚазАқпарат - Қазақстандық Бейбіт Жукаев Ыстанбұл челленджер турнирінде табысты өнер көрсетті, деп хабарлайды ҚазАқпарат тілшісі.
Қазақстан теннис федерациясынан мәлім еткеніндей, дүниежүзілік рейтингте 357-сатыда тұрған Б.Жукаев ширек финалда әлемнің 108-ракеткасы, молдовалық Раду Алботты жеңіп кете жаздады.
Екі сағатқа созылған тартысты бәсекеде қазақстандық теннисші қатты қарсылық көрсетіп, 2:6, 6:4, 6:7 (4:7) есебімен жол берді.
Ақтау теннис мектебінің түлегі 19 эйс жасап, 3 брейк-пойнттың екеуін пайдалана білді.
Ыстанбұл жарысының ширек финалына шығуы нәтижесінде Б.Жукаев алдағы дүйсенбіде жаңартылатын әлемдік 323-орынға көтеріледі.
Еске сала кетейік, бұдан бұрын Елена Рыбакинаның Словениядағы жарыстың жартылай финалына шыққанын жазған болатынбыз.
Сондай-ақ қазақстандық жасөспірім теннисшілер Азия біріншілігінің финалына шықты.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).