НҰР-СҰЛТАН. ҚазАқпарат - Қазақстандық теннисші Бейбіт Жукаев Ыстанбұл челленджер турнирінің екінші айналымына шықты, деп хабарлайды ҚазАқпарат тілшісі.
Әлемнің 357-ракеткасы, Ақтау теннис мектебінің түлегі негізгі додаға іріктеу сайыстарынан кейін қосылған болатын.
Бейбіт алғашқы айналымда дүниежүзілік рейтингте 1538-орында тұрған түркиялық Аксу Ченгизбен шеберлік байқасты.
Қазақстандық спортшы бір сағаттан астам уақытқа созылған матчта 6:3, 6:4 есебімен жеңіске жетті.
Бейбіт Жукаев 5 эйспен бірге 6 брейк-пойнттың тең жартысын пайдалана білді. Қарсыласы 2 эйс, 1 брейктен аса алмады.
Б.Жукаев ширек финалға шығу үшін әлемнің 234-ракеткасы, испаниялық Николас Альварес Варонамен таласады.
Еске сала кетейік, бұдан бұрын теннистен Дэвис кубогында Қазақстан Нидерланды командасымен кездесетінін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).