НҰР-СҰЛТАН. ҚазАқпарат - Қазақстандықтар Александр Недовесов пен Андрей Голубев жұптық сында Загреб (Хорватия) челленджер турнирінің финалына шықты, деп хабарлайды ҚазАқпарат тілшісі.
Осы жарыстың бірінші ракеткалары болып тіркелген Недовесов пен Голубев ширек финалда тағы бір қазақстандық Дмитрий Попко - чилилік Алехандро Табиломен кездесуі керек еді.
Әйтсе де қарсыластары ойынға келмей қалды да, қазақстандықтар жартылай финалға өтті.
Жартылай финалда Польша өкілдері Шимон Вальков - Ян Зелинскимен шеберлік байқасты.
Қазақстандық жұп 7:6 (7:5), 6:4 есебімен жеңіске жетті.
Бәсеке сағат жарымға созылды.
А.Недовесов пен А.Голубев финалда америкалықтар Эван Кинг - Хунтер Рис немесе монаколық Ромен Арнеодо - франциялық Альбано Оливетти жұптарының қай жеңгенімен бас жүлдені сарапқа салады.
Тағы бір қазақстандық Тимофей Скатов Түркиядағы Анталия ITF жарысының ширек финалында аустриялық Александр Эрлерге 6:4, 2:6, 1:6 есебімен есе жіберді.
Еске сала кетейік, бұдан бұрын Тимофей Скатовтың Түркиядағы турнирдің ширек финалына шыққанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).