НҰР-СҰЛТАН. ҚазАқпарат – Қазақстандықтар Александр Недовесов пен Андрей Голубев жұптық сында Хорватиядағы Сплит 2 челленджер турнирінің ширек финалына шықты, деп хабарлайды ҚазАқпарат тілшісі.
Қазақстандық жұп бұдан бір апта бұрын Сплиттегі осындай бірінші жарыста жеңімпаз атанған болатын.
Бұл жолы доданың 2-ракеткалары болып тіркелген А.Недовесов пен А.Голубев бастапқы кездесуін корт иелері Борна Гойо – Нино Сердарушичпен өткізді.
Бірінші партияда тай-брейкте хорватиялық жұптың жолы болды – 7:6 (8:6).
Екінші сетте қазақстандықтар әбжілдік танытты – 7:6 (7:4).
Шешуші тай-брейкте А.Недовесов пен А.Голубев жеңісті жұлып алды – 10:7.
Тартысты бәсеке 2 сағат 9 минутқа созылды.
Қазақстандық жұп жартылай финалға шығу үшін чехиялықтар Зденек Колар – Лукаш Росолмен таласады. Недовесов пен Голубев Сплиттегі бірінші турнирдің жартылай финалында чехиялық жұпты тартысты кездесуде жеңген болатын.
Еске сала кетейік, бұдан бұрын А.Бубликтің Монте-Карло мастерс турнирінде жеңіліп қалғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).