НҰР-СҰЛТАН. ҚазАқпарат – Қазақстандық теннисшілердің Цинциннати (АҚШ) турниріндегі қарсыластары белгілі болды, деп хабарлайды ҚазАқпарат тілшісі.
Ерлер арасында 15-21 тамыз аралығында өтетін Цинциннати мастерс жарысында Қазақстанның бірінші, әлемнің 41-ракеткасы Александр Бублик алғашқы айналымда дүниежүзілік рейтингте 21-орында тұрған аустралиялық Алекс Де Минаурмен кездеседі.
Әйелдер арасындағы Цинциннати додасында Қазақстанның бірінші, әлемнің 27-ракеткасы Елена Рыбакина бастапқы бәсекесін іріктеу сайысы жеңімпаздарының бірімен өткізеді.
Торонто турнирінің ширек финалына дейін жеткен Юлия Путинцева бірінші айналымда америкалық Мэдисон Кизбен шеберлік байқасады.
Қазіргі кезде іріктеу сайыстары өтіп жатқан Цинциннати турнирі – АҚШ-тың ашық чемпионаты алдындағы ең соңғы ірі жарыс. US Open биыл 29 тамызда басталады.
Еске сала кетейік, бұдан бұрын Жібек Құламбаеваның Өскемен турнирінің финалына жолдама алғанын жазған болатынбыз.
Ал Юлия Путинцева Торонто турнирінің жартылай финалына шыға алмады.
Фото : drmichellecleere.com
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).