НҰР-СҰЛТАН. ҚазАқпарат – Қазақстандық Сандуғаш Кенжебаева Уимблдон жасөспірімдер турнирінде негізгі жарысқа жолдама алды, деп хабарлайды ҚазАқпарат тілшісі.
Қазақстан теннис федерациясынан мәлім еткендей, Сандуғаш өз спорттық жолында алғаш рет «Үлкен дулығаның» негізгі турниріне өтті.
Team Kazakhstan академиясының түлегі Уимблдон іріктеу сайыстарының финалында 18 жасқа дейінгілер арасында әлемнің 85-ракеткасы, нидерландылық Исис ван ден Брейкті тартысты матчта 6:1, 5:7, 10:8 есебімен ұтты.
«Мен Уимблдонда негізгі додаға өткеніме өте қуаныштымын. Іріктеу сайыстарында әр ойынға ең соңғы бәсеке секілді сезініп, тыңғылықты дайындалдым. Енді алдағы аптада бар өнерімді салатын боламын», деді С.Кенжебаева.
Тағы бір жас қазақстандық Жанель Рүстемова іріктеу сайыстарының финалында словениялық Эла Нала Миличке жол берді – 3:6, 2:6.
Еске сала кетейік, бұдан бұрын қазақстандық жас теннисшінің Уимблдон жарысын жеңіспен бастағанын, Елена Рыбакинаның US Open чемпионын ұтқанын жазған болатынбыз.
Фото: ktf.kz
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).