Бұлардың саны 514 мың адамды құрайды. Бүгін ҚР Парламенті Мәжілісінде «Нұр Отан» ХДП Фракциясы жанындағы Әлеуметтік кеңестің отырысы барысында Еңбек және халықты әлеуметтік қорғау вице-министрі Серік Ахметов осылай мәлім етті. Естеріңізге сала кетейік, жиын «Мемлекеттің оралмандарға қызмет түрлеріне қол жеткізуді қамтамасыз ету саласындағы әлеуметтік саясаты» тақырыбында өткен болатын.
Вице-министрдің айтуынша, тәуелсіздік жылдарынан бері Қазақстанға келіп жатқан этникалық қазақтардың негізгі бөлігін үш мемлекет құрайды. Бұлар : Өзбекстан - келушілер саны - 514 мың адам, Моңғолия - 114 мың және Қытай - 95 мың адам. «Қазақстанға тұрақты тұруға келіп жатқан оралмандардың басым бөлігі өздері шыққан елдерге жақын өңірлерге орналасқысы келеді. Мәселен, Ресейден келгендер солтүстік өңірлерге, Өзбекстаннан оралғандар - оңтүстікке, Моңғолиядан келгендер Шығыс Қазақстанға қоныстанады», - дейді С. Ахметов.