НҰР-СҰЛТАН. ҚазАқпарат – Қазақстан жасөспірімдер құрамасы Үндістанның Нью-Дели қаласында өтіп жатқан Билли Джин Кинг кубогының (әлем чемпионаты) іріктеу сайысын жеңіспен бастады, деп хабарлайды ҚазАқпарат тілшісі.
Қазақстан теннис федерациясы мәлім еткендей, қазақстандық жасөспірім қыздар бүгін D тобында Оңтүстік Корея командасымен шеберлік байқасты.
Алғашқы болып кортқа Асылжан Арыстанбекова шықты. Оның Ким Ё Юнмен кездесуі тартысты өрбіді. Бірінші партияда қазақстандық теннисші басымдылық танытты – 6:3. Екіншісінде брейк жасаған кореялық спортшы есе қайырды – 6:4. Үшінші, шешуші сетте ол еш мүмкіндік қалдырған жоқ – 6:0.
Екінші ойында Айя Нұпбай Сон Ха Юнды оңай жеңді – 6:1, 6:2.
Матч тағдыры жұптық сында шешілді. Мұнда А.Нұпбай Карина Жұмаджановамен бірге бір сағатқа жуық уақыт ішінде Сон Ха Юн мен Ким Ё Юнның меселін қайырды – 6:4, 6:1.
Ертең Қазақстан жасөспірімдер құрамасы Вьетнам қыздарымен ойнайды. Вьетнамдықтар бүгін Сингапур құрамасын 2:1 есебімен тізе бүктірді.
Еске сала кетейік, бұдан бұрын Қазақстан жасөспірімдер құрамасының қарсыластары анықталғанын, қазақстандық теннисшілердің әлемдік рейтингіде жеке рекордтық нәтижеге қол жеткізгенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).