Қазақтың танымал меценаты «ЭКСПО-2017» жалауын желбіретіп, жер шарын аралап шықпақ
Жиналған журналистер алдында саяхатшы-жиһанкез Сапар Ысқақов, Л.Н.Гумилев атындағы Еуразия ұлттық университетінің кафедра меңгерушісі Ғаділбек Шаяхметов, «Астана ЭКСПО-2017» ҰК» АҚ-тың Коммуникация және маркетинг департаментінің директоры Әсел Қожақова және басқалар 2014 жылдың 10 қаңтарында Англияның Саутгемптон айлағынан бастау алатын осы сапар туралы тілге тиек етті. Бұл шараға қатысатын саяхатшылар 20-дан астам елге барады. Жер шарын айналып өту сапары барысында Сапар Ысқақов халықаралық ұйымдардың өкілдерімен кездесіп, қазақ елін шетелдіктерге таныстырып, Астана қаласында 2017 жылы Бүкіләлемдік мамандандырылған көрме өтетіндігі туралы жарнама жасайды. Сапар Ысқақов бастаған экспедиция құрамында 4 адам, оның ішінде журналист пен оператор бар. Олар теңіз жолы арқылы «Queen Elizabeth-6» лайнерімен Жер шарын айналып шықпақ.
Белгілі кәсіпкер Сапар Ысқақовтың негізгі мамандығы - құрылысшы. Ол негізін қалаған жекеменшік «Тілеп» құрылыс компаниясы Астана қаласындағы бірқатар құрылыс нысандарын салуда айшықты қолтаңбасын қалдырған. Соңғы жылдары Сапар Ысқақовтың меценат ретінде атағы шыққан. 2013 жылы ол «Тілеп» атты қайырымдылық қорын құрып, мүгедек және әлеуметтік жағынан аз қамтамасыз етілген азаматтарға қамқорлық жасап келеді. Осындай игі істерінің нәтижесінде ол 3 жыл қатарынан еліміздің «Жыл адамы» атанды.
Сонымен бірге, Сапар Ысқақов көпшілікке кеңінен белгілі саяхатшы болып саналады. Әлемнің 6 құрлығын бағындырған жиһанкез Сапар Ысқақов 2007 жылы Оңтүстік полюстен шамамен 100 шақырым жерде орналасқан «Амундсен-Скотт» америкалық стансасында болып, онда Қазақстан мен «Нұр Отан» партиясының туларын орнатқан болатын. Ол - Жер шарының 6 құрлығының 100-ден астам елін аралап, Антарктида мен Арктикаға табаны тиген алғашқы қазақтың бірі, деп жазады «Егемен Қазақстан» республикалық басылымы.