Қазалыда Ұлттық спорт ойындарынан спартакиада мәреге жетті
16:26, 04 Қазан 2016
ҚЫЗЫЛОРДА. ҚазАқпарат - Қазалы ауданында ауыл спортшыларының XXX «Алтын күз - 2016» облыстық спартакиада бағдарламасы бойынша көкпар, аударыспақ, теңге ілу сайыстары аяқталды.
Облыстық дене шынықтыру және спорт басқармасының баспасөз қызметінен хабарлағандай, шара мақсаты - Елбасы Жолдауына сәйкес бұқаралық спортты дамыту, ауылдық жерлерде саламатты өмір салтын қалыптастыру, ұлттық ойындарды халық арасында кеңінен насихаттау және аймақ жастарының ұлттық спортқа қызығушылығын арттыру.
Спартакиада нәтижесінде көкпардан Жаңақорған ауданы жеңімпаз атанса, Шиелі - екінші, Қармақшы - үшінші орындарды иеленді.
Аударыспақ шеберлері 3 салмақ дәрежесінде сынға түсті. Жаңақорғандықтар өздерінің мықтылықтарын көрсетіп, бас жүлдені жеңіп алды. Қазалы - күміс, Сырдария - қола жүлделерді иеленді.
Теңге ілу сайысында Жаңақорған көш бастаса, Шиелі - екінші, Сырдария - үшінші орындарды еншіледі.