ҚЫЗЫЛОРДА. ҚазАқпарат – Қызылорда облысында жасөспірімді ұрып-соғу оқиғасына байланысты Қазалы аудандық білім бөлімінің басшысына қатаң сөгіс берілді, деп хабарлайды ҚазАқпарат тілшісі.
«Кемшіліктерге жол берген Қазалы аудандық білім бөлімінің басшына қатаң сөгіс жарияланды. Өзге де тиісті мамандардың жауапкершілігі қаралады», -деді облыстық білім басқармасының басшысы Мейрамбек Шермағанбет.
Облыстық білім басқармасының басшысы аудан әкімімен бірге жоғары сынып оқушылары, ата-аналар, мұғалімдермен кездесу өткізді. Онда тәртіп пен тәрбие мәселелері талқыланды.
Еске салсақ, Қызылорда облысы Қазалы ауданында 6 сәуірде екі мектеп оқушылары арасында жанжал туындаған. Оған байланысты Қылмыстық кодекстің 293-бабына сәйкес тергеу жұмыстары жүргізіліп жатыр.
Осы оқиғаға байланысты ІІМ-ге аудандық полиция бөлімінің бастығын қызметінен алу жөнінде ұсыныс жолданды. Тағы 10 қызметкер қатаң сөгіс, сөгіс және ескерту түрінде тәртіптік жазаға тартылды.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.