«Қазатомөнеркәсіп» уран өндіру көлемін 2017 жылғы деңгейге жеткізе алмай келеді

АСТАНА. KAZINFORM – «Қазатомөнеркәсіп» ұлттық атом компаниясы Kazinform сауалына жолдаған жауапта кейінгі жеті жылда уран өндіру көлемі қалай өзгергені туралы мәлімет ұсынды.

«Қазақстанда уранды негізінен «Қазатомөнеркәсіп» ҰАК» АҚ-ның кәсіпорындары ұңғыма арқылы шаю тәсілімен алады. Кестеде 2017-2023 жылдары алынған уран көлемі көрсетілген», - деп жазады кәсіпорын мамандары.

Аталған кестеден 2017 жылы кәсіпорын 23,4 мың тоннаға жуық уран өндірсе, 2023 жылы 21 мың тоннаға жуық уран алғанын көруге болады.

Жыл	2017	2018	2019	2020	2021	2022	2023
Өндіру көлемі, тонна	23390,6	21699,4	22761,1	19586,6	21834,1	21278,9	20996,0

«Қазақстанда уран өндірумен «Қазатомөнеркәсіптен» бөлек «Фирма Балауса» ЖШС айналысады. Олар уранды Қызылорда облысындағы уран-ванадий кенішінен алады. Мұндағы уран ілеспе өнім екенін айту керек. Ал «ТЭК Беркут» ЖШС Алматы облысындағы уран-көмір кенішін игеріп жатыр. Мұнда да уран ілеспе өнім», - деп жазылған жауапта.