Қазіргі кезде жас мамандарды мектепке тарту және ұстау қиын болып отыр - Қазақстанның Еңбек Ері Аягүл Миразова

АЛМАТЫ. Тамыздың 25-і. ҚазАқпарат /Нәзира Елеухан / - Еліміз тәуелсіздік алған алғашқы жылдан бастап, білім саласының дамуын басты назарында ұстап, қолдау көрсетіп келеді. Елбасы қазақстандық жас ұрпақтың әлемдік стандартқа сай білім алуы үшін қажетті жағдай жасауда.

Мемлекет мектеп мұғалімдерінің рөлін көтеруде жан-жақты қолдау көрсетіп, білім саясатына басымдық берді. Ұстаз беделін қоғам алдында көтеру үшін Елбасының тікелей жарлығымен еліміздің ең жоғарғы марапаты - "Қазақстанның Еңбек Ері" атағы мен "Алтын жұлдыз" белгісі және "Отан" ордені ең бірінші рет ұстазға берілді. Бұл мектеп мұғалімі еңбегінің жоғары құрметтелетіндігінің айғағы. Бұл туралы бүгін Алматыда өткен білім беру қызметкерлерінің тамыз кеңесінде №159-шы гимназияның директоры, Қазақстанның Еңбек Ері Аягүл Миразова айтты, деп хабарлайды ҚазАқпарат.

Оның айтуынша, мемлекет әрқашан ұстаздарға қолдау көрсетіп, жылма-жыл жалақыларын көтеруде. "Мұғалім еңбегі нағыз беделге ие болуы үшін оған жақсы мектеп керек. Бұл жағынан да еліміз қарап отырған жоқ. Білім беру жүйесінің дамуына үлкен серпін берген "100 мектеп, 100 емхана" бағдарламасы мұғалімнің еңбек ететін орнын жақсартуда", деп атап өтті Аягүл Миразова.

Оның пікірінше, болашақтың тағдыры ұстаздардың білім деңгейіне байланысты. "Мұғалімдерге қойылған талап өскен сайын, оның жауапкершілігі арта түсуі тиіс. Бұны мұғалімдердің барлығы түсінеді. Түсінгендіктен, ұрпақ тәрбиесіне адал қарайды. Олардың балаларға деген сүйіспеншілігі, қоғамға деген жауапкершілік сезімдері өрлей бермесе, кемімейді", деді ол.

Ұстаздың айтуынша, мұғалімдер тарапына айтылатын сынмен қатар, мұғалім беделін көтеру үшін, олардың еңбектері мен табыстары БАҚ-да насихатталуы тиіс.

"Жаңаша оқуды жүзеге асыратын негізгі күш - жас мұғалімдер. Сондықтан, оларға материалдық көмек көрсетіп, қолдау қажет. Қазіргі уақытта жас мамандарды мектепке тарту және ұстау қиын болып отыр. Өйткені, олардың жалақылары өмір сүру қажетіне жеткіліксіз. Бұған тежеу жасау үшін, аттестациялауға өзгерістер енгізу керек. 5 жыл еңбек өтіліне жету үшін біршама уақыт қажет. Аз жалақымен бұл межеге жеткенше, көпшілігі қиындыққа шыдамай ауысып, басқа қызметке кетіп жатыр. Егер осылай жалғаса берсе, 10 жылдан кейін мектепте мамандар бұдан да тапшы болады", деп атап өтті құрметті ұстаз Аягүл Миразова.