ОРАЛ. ҚазАқпарат - Қазталов ауданында Бостандық ауылында бой көтеретін мәдениет үйінің іргесі қаланса, Жаңажолда жаңа ғимарат іске қосылды.
Осынау салтанатты рәсімдерге қатысқан облыс әкімінің орынбарасы Бақтияр Мәкеннің атап өткеніндей, мұндай шалғай ауылдарда қазіргі заманғы мәдениет ошақтарын пайдалануға берудің маңызы зор. Бостандық ауылындағы 200 орындық мәдениет үйінің құрылысына 96 млн. теңге бөлінген. Бұл жұмысты Серік Темірханов жетекшілік ететін «Жалпақтал - Су» ЖШС атқаруда. Ауылдан қазіргі күнде 15 адам маусымдық жұмысқа тартылса, алдағы уақытта тағы да сонша адам еңбекке қосылмақ. Ал Жаңажолдағы мәдениет үйінің іші-сырты бірдей жайнап тұр. Енді ол ауыл тұрғындарының, соның ішінде жеткіншек жастардың жиі бас қосатын рухани орталығына айналмақ.
Мерекелік шарада еңбек ардагері Нағым Ризуанов Жаңажолдағы қуаныш Астанада үш елдің басшылары Еуразиялық экономикалық одаққа бірігуге қол қойып жатқан тарихи күнмен тұспа-тұс келгенін айта келіп, облыс, аудан басшыларына ауыл тұрғындары атынан ризашылығын білдірді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).