Келбеті нашарлаған: Алматыда олимпиадалық даңқ музейі неліктен жабық тұр
АЛМАТЫ. KAZINFORM — 2016 жылдан бері Республикалық спорттық және олимпиадалық даңқ мұражайында жөндеу жұмыстары жүргізілмеген.
Әлеуметтік желіде алматылықтар Сейфуллин және Бөгенбай батыр көшелерінің қиылысында орналасқан Республикалық спорттық және олимпиадалық даңқ музейінің жабық тұрғанына шағымданды.
Осы орайда Kazinform агенттігі музей қарамағына кіретін Қазақ спорт және туризм академиясына хабарласып, мән-жайды анықтады.
Академия мәліметінше, мұражай келушілер легінің төмендеуіне байланысты ЖОО, спорт мектептері, жалпы білім беретін мектептер секілді мекемелерден алдын ала түскен сұраныстарға сәйкес, тек арнайы кесте бойынша жұмыс істейді: дүйсенбі 12:00–18:00, сәрсенбі 13:00–18:00, бейсенбі 11:00–15:00 жәна жұма 13:00–18:00.
Сонымен қатар Қазақ спорт және туризм академиясы тарихи ғимараттың нашар сыртқы келбетіне байланысты жауап берді.
— Мұражай ғимараты архитектуралық ескерткіштер санатына жататындықтан, біз «Қазқайтажаңғырту» РМК талаптарына сәйкес және осы мекеменің арнайы рұқсатынсыз ғимараттың сыртқы келбетіне күрделі жөндеу жұмыстарын жүргізе алмаймыз. Бірақ біздің мекеменің шаруашылық жұмыстарының жоспарына сәйкес, осы жылдың жаз мезгілінде жеңіл жөндеу жұмыстарын жүргізу жоспарланған, — деп түсіндірді академиядан.
Айта кеткен жөн, мұражай ғимараты 1888 жылы салынған. 1988 жылы ғимаратқа қайта қалпына келтіру бойынша күрделі жөндеу жұмыстары жүргізілген.
1999 жылы мұражай Қазақ спорт және туризм академиясының қарамағына өткен.
Ғимараттың сыртқы келбетіне және ішіндегі бөлмелеріне күрделі жөндеу жұмыстары соңғы рет 2016 жылы жасалған.
Қазақ спорт және туризм академиясының мәліметіне сәйкес, мұражайда жалпы саны 700 астам жәдігер сақталған.
Олардың қатарында: кубок, медаль, грамоталар, дипломдар, сувенирлер, фотосуреттер, әйгілі спортшылардың жеке заттары мен құжаттары, жартасқа салынған ежелгі суреттердің көшірмелері, бүркітшілердің арнайы атрибутикалары бар.
Еске салайық, бұған дейін Алматының Неке сарайы неліктен қараусыз қалғанын жазғанбыз.