АСТАНА. KAZINFORM – Құрлықтық хоккей лигасының (ҚХЛ) кезекті турында елордалық «Барыс» Новосібірдің «Сибирь» командасын қабылдады.
Осыған дейін новосібірліктер Шығыс конференциясында үздік сегіздікті түйіндеп тұрса, астаналықтар көш соңында еді.
Бірінші кезеңде айдын иелерінен Әлихан Әсетов есеп ашса, екінші таймда Всеволод Логвин 2:0-ге жеткізді. «Сибирьден» Георгий Белоусов есепті қысқартты.
Матч соңына таман Никита Сетдиков қос голдың авторы атанды. Қорытынды есеп – 4:1.
Осылайша, «Барыс» өткен жылғы желтоқсанның ортасынан бері алғаш рет негізгі уақытта жеңіске жетті. 17 желтоқсанда Мәскеуде «Динамоны» елордалықтар 2:0 есебімен ұтқан еді.
Ғалым Мәмбетәлиевтің шәкірттері 8 наурызда өз айдынында Мәскеудің ЦСКА командасын қабылдайды.
Шығыс конференциясында 33 ұпаймен «Барыс» бұрынғысынша соңғы орында келеді.
Еске сала кетейік, бұдан бұрын көш соңындағы «Барыстың» өз айдынында «Сибирьді» жеңе ала ма, соны жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).