АСТАНА. KAZINFORM — Құрлықтық хоккей лигасының (ҚХЛ) тұрақты чемпионатында елордалық «Барыс» кезекті кездесуін Новосібірде «Сибирь» командасымен өткізді.
Хоккей мамандары матч алдында айдын иелерін ойынның фавориті деп атаған. «Сибирь» соны дәлелдеп, 2:0 есебімен жеңіске жетті.
Бірінші кезеңде Тимур Ахияров есеп ашса, екінші таймда Владимир Бутузов өз мүмкіндігін мүлт жіберген жоқ.
Осыған дейін өз айдынында қатарынан 8 рет жеңілген «Сибирь» сол сәтсіз серияны тоқтатты. 27 ұпай жинаған новосібірліктер Шығыс конференциясында 9-орында болса, астаналықтар бұрынғыша 11-орында тұр.
Енді Ғалым Мәмбетәлиев жаттықтыратын хоккейшілер 29 қараша күні Магнитогорскіде «Металлургпен» шеберлік байқасады.
Еске сала кетейік, бұдан бұрын «Барыстың» жеңіп жатып, жеңіліп қалғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).