НҰР-СҰЛТАН. ҚазАқпарат – Құрлықтық хоккей лигасында (ҚХЛ) «Барыстың» «Витязь» командасымен кезекті ойыны өтпейтін болды, деп хабарлайды ҚазАқпарат тілшісі.
Мачттың тоқтатылуына «Витязь» командасының 4 спортшысынан ПТР тест нәтижесі бойынша коронавирус анықталуы себеп болған. Вирустың таралуын болдырмас үшін 13 қаңтарға белгіленген ойын өтпейтін болды. Қашан өтетіні кейін хабарланады.
Айта кетсек, елордалықтар 48 ұпаймен Шығыс конференциясында бұрынғысынша сегізінші орында келеді.
«Витязь» 43 ұпаймен Батыс тобында 10-сатыда тұр. Аталмыш клуб қатарынан төрт ойында жеңіліс тапты. Соңғы бәсекеде «Северстальға» овертаймда 2:3 есебімен есе жіберді.
Юрий Михайлистің шәкірттері жаңа жылда үш рет қатарынан жеңіске қол жеткізді. Соның ішінде көш бастаушы командалардың бірі – «Металлург» (Магнитогорск) клубын екі мәрте ұтты.
Елорда уақытымен сағат 22.30-да басталатын «Витязь» - «Барыс» матчын «Qazsport» телеарнасынан тікелей эфирде қарауға болады.
Еске сала кетейік, бұдан бұрын «Барыстың» «Торпедомен» ойыны кейінге қалғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).