НҰР-СҰЛТАН. ҚазАқпарат – Құрлықтық хоккей лигасының кезекті турында елордалық «Барыс» өз айдынында «Металлург» (Магнитогорск) командасын қабылдайды, деп хабарлайды ҚазАқпарат тілшісі.
«Металлург» 68 ұпаймен ҚХЛ-дың жалпы кестесінде, сондай-ақ Шығыс конференциясында көш бастап келеді.
Елордалық команда 44 ұпаймен Шығыс тобында сегізінші сатыда тұр.
Юрий Михайлистің шәкірттері өткен турда Риганың «Динамосын» 7:1 есебімен ойсырата ұтқан болатын. Соның ішінде «Барыстың» сұрмергені Никита Михайлис нәтижелі пас беріп, екі голдың авторы атанған еді.
«Металлург» сырт айдында өткізген соңғы бес кездесуінің екеуінде ғана жеңіске жетті. «Витязь» (5:3) бен «Салават Юлаевты» (4:3, овертаймда) тізе бүктірді. Есесіне «Ак Барс» командасына овертаймда (3:4) есе жіберді. «Динамо» (Минск, 0:1) және «Авангард» (2:4) командаларынан да айласын асыра алмады.
«Барыс» өз айдынында қарқынды ойын таныта ала ма, оны бүгінгі кездесу көрсетеді.
Елорда уақытымен сағат 19.30-да басталатын матчты «Qazsport» телеарнасынан тікелей эфирде қарауға болады.
Еске сала кетейік, бұдан бұрын «Барыстың» жаңа жылдағы алғашқы кездесуінде жеңіске жеткенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).